កុមារាកុមារី ជាទំពាំងស្នងឫស្សី ឬជាសសរទ្រូងនៃជាតិ ទំពាំងអាចលូតលាស់បាន ហើយអាចក្លាយទៅជា ឫស្សីបាន ព្រោះកុមារត្រូវការអប់រំ រៀនសូត្រ និងបណ្តុះបញ្ញាស្មារតី ចំណែកកុមារត្រូវការការពារ ការចិញ្ចឹមបីបាច់ថែរក្សា ទំនុកបម្រុងផ្ចុងផ្តើមពីមនុស្សចាស់ មនុស្សជំនាន់មុនជាចាំបាច់។ បើចង់បានអ្នកស្នងប្រទេសជាតិ ដែលខ្លាំង រឹងមាំ ទាល់តែពង្រឹងនិងសម្រួចតាំងពីនៅក្មេងៗ។ កុមារត្រូវតែទទួលបានការថែទាំ អប់រំយ៉ាងយកចិត្តទុកដាក់ ទាំងផ្នែកចំណេះដឹង ស្មារតី មនសិកាស្នេហាជាតិ សីលធម៌ សុជីវធម៍ នៅក្នុងការរស់នៅប្រចាំថ្ងៃ ហើយត្រូវនាំគ្នាប្រឆាំងដាច់ខាត រាល់ការរើសអើង ការជួញដូរ កេងប្រវ័ញ្ចន៍ ។ កុមារាកុមារីខ្មែរក្រោម ទាល់តែវិស្សមកាលភាសាវៀតណាម ទើបបានមកសិក្សាភាសា អក្សរសាស្ត្រជាតិតាមវត្តអារាម តាមភូមិរបស់ខ្មែរបានទូលំទូលាយជាង។ កុមារាកុមារីខ្មែរក្រោមចេះ អាន ចេះសរសេរ ចេះនិយាយភាសាខ្មែរ ដែលជាភាសាកំណើត ភាសាឪម៉ែបាន ក៏ដោយសារបានជិតដិតនឹងវត្ត ជិតដិតព្រះសង្ឃ ព្រះសង្ឃបានអប់រំ ហ្វឹកហាត់លត់ដំ ដើម្បីដឹងនូវវប្បធម៌ អក្សរសាស្ត្រ ប្រពៃណី ទំនាមទម្លាប់ខ្មែរបានដល់ពេលបច្ចុប្បន្ន។
