 |
| ខ្នាតនិងខ្ទង់ចីវរតាមពុទ្ធានុញ្ញាតក្នុងព្រះពុទ្ធសាសនា |
គ្រានោះ ព្រះមានព្រះភាគគង់នៅក្នុងក្រុងរាជគ្រឹះ សមគួរដល់ពុទ្ធអធ្យាស្រ័យ ហើយទ្រង់យាងចេញទៅ កាន់ចារិកក្នុងទក្ខិណាគីរីជនបទ ។ ព្រះមានព្រះភាគទ្រង់ឃើញស្រែអ្នកដែនមគធៈ មានសណ្ឋានជាស្រែមានជ្រុងបួន មានសណ្ឋានជាស្រែមានភ្លឺវែងដោយបណ្តោយផង ទទឹងផង មានសណ្ឋានជាស្រែមានភ្លឺខ្លីក្នុងចន្លោះ ៗ មានសណ្ឋានជាជ្រុងបួន ដោយមានភ្លឺខ្លី បាញ់រត់គ្នា លុះទ្រង់ទតឃើញហើយ ក៏ត្រាស់ហៅ ព្រះអានន្ទដ៏មានអាយុថា នែអានន្ទ អ្នកឃើញស្រែអ្នកដែនមគធៈ មានសណ្ឋានជាស្រែមានជ្រុងបួន មានសណ្ឋានជាស្រែមានភ្លឺវែងដោយបណ្តោយផងទទឹងផង មានសណ្ឋានជាស្រែមានភ្លឺខ្លីក្នុងចន្លោះៗ មានសណ្ឋាន បួនជ្រុងដោយមានភ្លឺខ្លី ក្នុងចន្លោះ ៗ មានសណ្ឋានជា បួនជ្រុងដោយមានភ្លឺខ្លីបាញ់រត់គ្នាឬទេ។ ព្រះអានន្ទក្រាបទូលថា ព្រះករុណាព្រះអង្គ ។ ព្រះដ៏មានព្រះភាគទ្រង់ត្រាស់សួរថា នែអានន្ទ អ្នកអាចចាត់ចែងចីវរបែបនេះដល់ភិក្ខុទាំងឡាយបានឬទេ ។ ព្រះអានន្ទក្រាបទូលថា បពិត្រព្រះដ៏មានព្រះភាគ ខ្ញុំករុណសអាចធ្វើបាន ។ វេលានោះ ព្រះដ៏មានព្រះភាគ ទ្រង់គង់ក្នុងទក្ខិណាគិរីជនបទ គួរដល់ពុទ្ធអធ្យាស្រ័យហើយក៏ទ្រង់យាងត្រឡប់មកក្រុងរាជគ្រឹះវិញ ។ ខណៈនោះ ព្រះអានន្ទដ៏មានអាយុក៏បានចាត់ចែងចីវរដល់ភិក្ខុទាំងឡាយជាច្រើនរូប រួចហើយចូលទៅគាល់ព្រះមានព្រះភាគ លុះចូលទៅដល់ហើយក៏ក្រាបបង្គំទូលព្រះដ៏មានព្រះភាគ យ៉ាងនេះថា បពិត្រព្រះអង្គដ៏ចំរើន សូមព្រះដ៏មានព្រះភាគទ្រង់ទតចីវរដែលខ្ញុំព្រះអង្គបានចាត់ចែងហើយចុះ ។ ព្រោះនិទាននេះ ដំណើរនេះ ព្រះដ៏មានព្រះភាគក៏ធ្វើនូវធម្មីកថាក្នុងវេលានោះ រួចត្រាស់ហៅភិក្ខុទាំងឡាយ មកថា ម្នាលភិក្ខុទាំងឡាយ អានន្ទជាបណ្ឌិត ម្នាលភិក្ខុទាំងឡាយ អានន្ទជាអ្នកមានប្រាជ្ញាច្រើន ។ ព្រោះថាពាក្យដែលតថាគតពោលហើយ ដោយសង្ខេប អានន្ទអាចដឹងសេចក្តីដោយពិស្តារបាន ហើយចេះធ្វើសំពត់ឈ្មោះ កុសិផង ធ្វើសំពត់ឈ្មោះ អឌ្ឍកុសិផង ធ្វើសំពត់ឈ្មោះ មណ្ឌលៈផង ធ្វើសំពត់ឈ្មោះ អឌ្ឍមណ្ឌលៈផង ធ្វើសំពត់ឈ្មោះ វិវដ្ដៈផង ធ្វើសំពត់ឈ្មោះ អនុវិវដ្ដៈផង ធ្វើសំពត់ឈ្មោះ គីវេយ្យកៈផង ធ្វើសំពត់ឈ្មោះ ជង្ឃេយ្យកៈផង ធ្វើសំពត់ឈ្មោះ ពាហន្តៈផង ហើយសំពត់នោះ អានន្ទក៏បានកាត់ដាច់ឱ្យសៅហ្មងដោយមុខកាំបិតឱ្យសមគួរដល់សមណៈ ឱ្យជារបស់មិនគួរប្រាថ្នា ដល់ពួកចោរជាសត្រូវ ម្នាលភិក្ខុទាំងឡាយ រួចព្រះអង្គទ្រង់អនុញ្ញាតថាៈ
អនុជានាមិ ភិក្ខវេ ឆិន្នកំ សង្ឃាដី ឆិន្នកំ ឧត្តរាសង្គំ ឆិន្នកំ អន្តរវាសកំ។ ម្នាលភិក្ខុទាំងឡាយ តថាគតអនុញាត សង្ឃាដីកាត់ ឧត្តរាសង្គៈកាត់ អន្តរវាសកៈកាត់ ។ (វិន័យបិដក ភាគ ៨ ទំព័រ ១១៦-១១៨)
មួយចំអាមព្រះសុគតគឺស្មើនឹង ៣ ចំអាមរបស់មជ្ឈិមបុរសក្នុងកាលឥឡូនេះ ។ មានន័យថា ៣ ចំអាម មជ្ឈិមបុរសស្មើ ១ ចំអាម ព្រះសុគត ១ ចំអាមព្រះសុគតស្មើ ១ ហត្ថ ១ ចំអាម ដោយហត្ថរបស់ជាងឈើ ។ (ក្នុងគម្ពីរ កង្ខាវិតរណី)
ត្រៃចីវរមាន ៤ ប្រភេទ
១. បញ្ចខណ្ឌ ចីវរ ៥ ផ្ទាំង
២. សត្តខណ្ឌ ចីវរ ៧ ផ្ទាំង
៣. នវខណ្ឌ ចីវរ ៩ ផ្ទាំង
៤. ឯកាទសខណ្ឌ ចីវរ ១១ ផ្ទាំង
